मंगलाचरण
ॐ नमो मंगलं कुर्यात्, ह्रीं नमश्चापि मंगलम्।
मोक्षबीजं महामंत्रं, अर्हं नम: सुमंगलम्।।१।।
ऋषभेश्वर! नौमि त्वां, सज्जातिपददायकम्।
चंद्रप्रभं जिनं वन्दे, सद्गार्हस्थ्यविधायकम्।।२।।
नेमिनाथ! नमामि त्वां, पारिव्राज्यपदाप्तये।
सुरेन्द्रत्वपदप्राप्त्यै, पार्श्वनाथं नमाम्यहम्।।३।।
शीतलेश! नमामि त्वां, साम्राज्यस्थानप्राप्तये।
आर्हन्त्यपदप्राप्त्यर्थं, शांतिनाथं नुमो मुदा।।४।।
निर्वाणपदलब्ध्यर्थं, महावीरस्वामिनं नुम:।
सप्ततीर्थंकरान् नौमि, सप्तभयविहानये।।५।।
सप्ततीर्थंकरा लोके, सप्तपरमस्थानदा:।
सर्वसिद्धिप्रदातार-स्तेभ्यो मेऽनन्तशो नम:।।६।।
सप्तभूमिमतिक्रम्य, येऽष्टमीभूमिहेतवे।
यजन्ते भक्तितो भव्या:, प्राप्नुवन्त्यन्तिमां गतिम्।।७।।
अथ जिनयज्ञप्रतिज्ञापनाय मंडलस्योपरि पुष्पांजलिं क्षिपेत्।
