प्राकृत निर्वाण भक्ति

अट्ठावयम्मि उसहो, चंपाए वासुपुज्ज-जिणणाहो।
उज्जंते णेमिजिणो, पावाए णिव्वुदो महावीरो।।१।।

वीसं तु जिणविंरदा, अमरासुर-वंदिदा धुदकिलेसा।
सम्मेदे गिरिसिहरे, णिव्वाण गया णमो तेसिं।।२।।

सत्तेव य बलभद्दा, जदुव-णरिंदाण अट्ठकोडीओ।
गजपंथे गिरिसिहरे, णिव्वाण गया णमो तेसिं।।३।।

वरदत्तो य वरंगो, सायरदत्तो य तारवरणयरे।
आहुट्ठयकोडीओ, णिव्वाण गया णमो तेसिंं।।४।।

णेमिसामी पज्जुण्णो, संबुकुमारो तहेव अणिरुद्धो।
बाहत्तरकोडीओ, उज्जंते सत्तसया सिद्धा।।५।।

रामसुआ विण्णि जण्णा, लाड-णिंरदाण पंचकोडीओ।
पावागिरिवर-सिहरे, णिव्वाण गया णमो तेसिं।।६।।

पंडुसुआ तिण्णि जणा, लाड-णिंरदाण अट्ठकोडीओ।
सित्तुंजय-गिरिसिहरे, णिव्वाण गया णमो तेसिं।।७।।

रामहणू-सुग्गीवो, गवय-गवक्खो व णीलमहणीलो।
णव-णवदी-कोडीओ, तुंंगीगिरि-णिव्वुदे वंदे।।८।।

अंगाणंगकुमारा१, विक्खा-पंचद्धकोडि-रिसिसहिया।
सुवण्णगिरि-मत्थयत्थे२, णिव्वाण गया णमो तेसिं।।९।।

दसमुहरायस्स सुआ, कोडी पंचद्ध-मुणिवरे सहिया।
रेवाउहयम्मि१ तीरे, णिव्वाण गया णमो तेसिं।।१०।।

रेवाणइए तीरे, पच्छिम-भायम्मि सिद्धवरकूडे।
दो चक्की छह कप्पे, आहुट्ठय-कोडिणिव्वुदे वंदे।।११।।

वडवाणी-वरणयरे, दक्खिण-भायम्मि चूलगिरि-सिहरे।
इंदजिय-कुंभयण्णो, णिव्वाण गया णमो तेसिं।।१२।।

पावागिरिवर-सिहरे, सुवण्ण-भद्दाइ मुणिवरा चउरो।
चेलणाणई-तडग्गे, णिव्वाण गया णमो तेसिं।।१३।।

फलहोडी-वरगामे, पच्छिम-भायम्मि दोणगिरिसिहरे।
गुरुदत्ताइमुणिंदा, णिव्वाण गया णमा तेसिं।।१४।।

णायकुमार-मुणिंदो, वालि-महावालि चेव अज्झेया।
अट्ठावय-गिरिसिहरे, णिव्वाण गया णमो तेसिं।।१५।।

अच्चलपुर-वरणयरे, ईसाणभाए मेढगिरि-सिहरे।
आहुट्ठय-कोडीओ, णिव्वाण गया णमो तेसिं।।१६।।

वंसत्थलम्मि णयरे, पच्छिमभायम्मि कुन्थगिरिसिहरे।
कुलदेसभूसणमुणी, णिव्वाण गया णमो तेसिं।।१७।।

जसहर-रायस्स सुआ, पंचसया कलिंगदेसम्मि।
कोडिसिलाए कोडिमुणी, णिव्वाण गया णमो तेसिं।।१८।।

पासस्स समवसरणे, १गुरुदत्त-वरदत्त-पंचरिसि-पमुहा।
रिस्सिंदी गिरिसिहरे, णिव्वाण गया णमो तेसिं।।१९।।

जे जिणु जित्थु तत्था, ते दु गया णिव्वुदिं परमं।
ते वंदामि य णिच्चं, तियरणसुद्धो णमंसामि।।२०।।

सेसाणं तु रिसीणं, णिव्वाणं जम्मि जम्मि ठाणम्मि।
ते हं वंदे सव्वे, दुक्खक्खय-कारणट्ठाए।।२१।।

पासं तह अहिणंदण, णायद्दहि मंगलाउरे वंदे।
अस्सारम्मे पट्टणि, मुणिसुव्वओ तहेव वंदामि।।२२।।

बाहूबलि तह वंदमि, पोदणपुर हत्थिणापुरे वंदे।
संती कुंथुव अरिहो, वाराणसीए सुपास पासं च।।२३।।

महुराए अहिछित्ते, वीरं पासं तहेव वंदामि।
जंबुमुणिंदो वंदे, णिव्वुइपत्तोवि जंबुवणगहणे।।२४।।

पंचकल्याणठाणइ, जाणिवि संजाद-मच्चलोयम्मि।
मणवयणकायसुद्धो, सव्वे सिरसा णमंसामि।।२५।।

अग्गलदेवं वंदमि, वरणयरे णिवणकुंडली वंदे।
पासं सिरिपुरि वंदमि, लोहागिरि-संखदीवम्मि।।२६।।

गोम्मटदेवं वंदमि, पंचसयं धणुहदेहउच्चं तं।
देवा कुणंति वुट्टी, केसर-कुसुमाण तस्स उवरिम्मि।।२७।।

णिव्वाणठाण जाणिवि, अइसय-ठाणाणि अइसये सहिया।
संजाद मिच्चलोए, सव्वे सिरसा णमंसामि।।२८।।

जो जण पढइ तियालं, णिव्वुइ-कंडंपि भावसुद्धीए।
भुंजदि णरसुरसुक्खं, पच्छा सो लहइ णिव्वाणं।।२९।।

अंचलिका

इच्छामि भंते! परिणिव्वाणभत्ति-काउस्सग्गो कओ तस्सालोचेउं इमम्मि अवसप्पिणीए चउत्थ-समयस्स पच्छिमे भाए आहुट्ठमासहीणे वासचउक्कमि सेसकम्मि, पावाए णयरीए कत्तियमासस्स किण्हचउद्दसिए रत्तीए सादीए णक्खत्ते पच्चूसे भयवदो महदिमहावीरो वड्ढमाणो सिद्धिं गदो,

तिसुवि लोएसु भवणवासिय-वाणविंतर-जोयिसिय-कप्पवासियत्ति चउव्विहा देवा सपरिवारा दिव्वेण गंधेण, दिव्वेण पुप्पेण, दिव्वेण धूवेण, दिव्वेण चुण्णेण, दिव्वेण वासेण, दिव्वेण ण्हाणेण, णिच्चकालं अच्चंति, पूजंति, वंदंति, णमंसंति परिणिव्वाण-महाकल्लाणपुज्जं करेंति।

अहमवि इह संतो तत्थ संताइं णिच्चकालं अंचेमि, पूजेमि, वंदामि, णमंसामि, दुक्खक्खओ, कम्मक्खओ, बोहिलाहो, सुगइगमणं, समाहिमरणं जिणगुणसंपत्ति होउ मज्झं।