पंचमहागुरुभक्ति

पंचमहागुरुभक्ति

मणुयणाइंदसुरधरियछत्तत्तया, पंचकल्लाणसोक्खावली पत्तया।
दंसणं णाण झाणं अणंतं बलं, ते जिणा दिंतु अम्हं वरं मंगलं।।१।।

जेहिं झाणग्गिवाणेहिं अइथद्दयं१ जम्मजरमरणणयरत्तयं दड्ढयं।
जेहिं पत्तं सिवं सासयं ठाणयं, ते महं दिंतु सिद्धा वरं णाणयं।।२।।

पंचआचारपंचग्गिसंसाहया, बारसंगाइं सुअजलहि-अवगाहया।
मोक्खलच्छी महंती महं ते सया, सूरिणो दिंतु मोक्खंगयासंगया।।३।।

घोरसंसार-भीमाडवीकाणणे, तिक्खवियरालणहपावपंचाणणे।
णट्ठमग्गाण जीवाण पहदेसया, वंदिमो ते उवज्झाय अम्हे सया।।४।।

उग्गतवचरणकरणेहिं झीणंगया, धम्मवरझाणसुक्केक्कझाणंगया।
णिब्भरं तवसिरीए समालिंगया, साहवो ते महं२ मोक्खपहमग्गया।।५।।

एण थोत्तेण जो पंचगुरु वंदए, गुरुयसंसारघणवेल्लि सो छिंदए।
लहइ सो सिद्धसोक्खाइं बहुमाणणं, कुणइ कम्मिंधणं पुंजपज्जालणं।।६।।

अरुहा सिद्धाइरिया,उवझाया साहु पंचपरमेट्ठी।
एयाण णमुक्कारा, भवे भवे मम सुहं दिंतु।।७।।

अंचलिका (गवासन से बैठकर पढ़ें)
इच्छामि भन्ते! पंचमहागुरुभक्तिकाओसग्गो कओ तस्सालोचेउं अट्ठमहापाडिहेर-संजुत्ताणं अरहंताणं, अट्ठगुणसंपण्णाणं उड्ढलोय-मत्थयम्मि पइट्ठियाणं सिद्धाणं, अट्ठपवयणमाउसंजुत्ताणं आइरियाणं, आयारादिसुदणाणो-वदेसयाणं उवज्झायाणं, तिरयणगुणपालण-रयाणं सव्वसाहूणं, णिच्चकालं अंचेमि पूजेमि वंदामि णमंसामि दुक्खक्खओ कम्मक्खओ बोहिलाहो सुगइगमणं समाहिमरणं जिणगुणसम्पत्ति होउ मज्झं।

(अनंतर नमस्कार करके कृत्य विज्ञापना करें।)
अथ पौर्वाण्हिक देववंदनायां पूर्वाचार्यानुक्रमेण सकलकर्मक्षयार्थं भावपूजावंदनास्तवसमेतं श्रीशांतिभक्तिकायोत्सर्गं करोम्यहं।
(प्रणाम करके ३ आवर्त, १ शिरोनति कर ‘णमो अरहंताणं’ इत्यादि सामायिक दंडक पढ़कर ३ आवर्त, १ शिरोनति करे। ९ बार णमोकार मंत्र पढ़कर कायोत्सर्ग करे, पुन: प्रणाम कर ३ आवर्त, १ शिरोनति करके ‘‘थोस्सामि’’ इत्यादि पढ़कर ३ आवर्त, १ शिरोनति करके वंदना मुद्रा से‘‘शांतिभक्ति पढ़े।’’)