(कवि भूधरदास द्वारा रचित)

अनित्य

राजा राणा छत्रपति, हाथिन के असवार।
मरना सबको एक दिन, अपनी अपनी बार।।१।।

अशरण

दलबल देवी देवता, मात पिता परिवार।
मरती विरियाँ जीव को, कोई न राखनहार।।२।।

संसार

दाम बिना निर्धन दुखी, तृष्णावश धनवान।
कहूँ न सुख संसार में, सब जग देख्यौ छान।।३।।

एकत्व

आप अकेला अवतरे, मरे अकेला होय।
यों कबहूँ या जीव को, साथी सगा न कोय।।४।।

अन्यत्व 

जहाँ देह अपनी नहीं, तहां न अपना कोय।
घर संपत्ति पर प्रकट हैं, पर हैं परिजन लोय।।५।।

अशुचि 

दिपै चाम चादर मढ़ी, हाड़-पीजरा देहा।
भीतर या सम जगत में, और नहीं घिन गेह।।६।।

आस्रव

मोहनींद के जोर, जगवासी घूमें सदा।
कर्मचोर चहुँओर, सरवस लूटें सुध नहीं।।७।।

संवर

सतगुरु देय जगाय, मोह नींद जब उपशमै।
तब कछु बनै उपाय, कर्म चोर आवत रूकें।।८।।

निर्जरा

ज्ञानदीप तप तेल भर, घर शोधें भ्रमछोर।
या विधि बिन निकसै नहीं, पैठे पूरब चोर।।९।।
पंच महाव्रत संचरन, समिति पंच परकार।
प्रबल पंच इन्द्रिय विजय, धार निर्जरा सार।।१०।।

लोक

चौदह राजु उतंग नभ, लोक पुरुष संठान।
तामें जीव अनादि तें, भरमत हैं बिन ज्ञान।।११।।

बोधिदुर्लभ

धन-कन कंचन राज सुख, सबहि सुलभकर जान।
दुर्लभ है संसार में, एक जथारथ ज्ञान।।१२।।

धर्म

जांचे सुरतरु देय सुख, चिन्तत चिन्ता रैन।
बिन जांचे बिन चिंतये, धर्म सकल सुखदैन।।१३।।