प्राकृत श्रुतभक्ति
सिद्धवरसासणाणं, सिद्धाणं कम्मचक्कमुक्काणं।
काऊण णमुक्कारं, भत्तीए णमामि अंगाइं।।१।।
आयारं सुद्दयणं, ठाणं समवाय विहाय-पण्णत्ती।
णाणाधम्म-कहाओ, उवासयाणं च अज्झयणं।।२।।
वंदे अंत-यड-दसं, अणुत्तर-दसं च पण्हवायरणं।
एयारसमं च तहा, विवायसुत्तं णमंसामि।।३।।
परियम्म-सुत्त पढमा-णुओय-पुव्वगय-चूलिया चेव।
पवरवर-दिट्ठिवादं, तं पंचविहं पणिवदामि।।४।।
उप्पायपुव्व-मग्गाय-णीय वीरियत्थिणत्थि य पवादं।
णाणा-सच्चपवादं, आदा-कम्मप्पवादं च ।।५।।
पच्चक्खाणं विज्जा-णुवाय कल्लाणणाम-वरपुव्वं।
पाणावायं किरिया-विसाल-मथ लोयबिंदु-सारसुदं।।६।।
दस चउदस अट्ठट्ठारस बारस तह य दोसु पुव्वेसु।
सोलह वीसं तीसं, दसमम्मि य पण्णरसवत्थू।।७।।
एदेसिं पुव्वाणं जावदियो वत्थुसंगहो भणियो।
सेसाणं पुव्वाणं, दसदसवत्थू पणिवदामि।।८।।
एक्केक्कम्मि य वत्थू, वीसं वीसं य पाहुडा भणिया।
विसम-समाविय वत्थू, सव्वे पुण पाहुडेहि समा।।९।।
पुव्वाणं वत्थुसयं, पंचाणवदी हवंति वत्थूओ।
पाहुड तिण्णिसहस्सा, णवय-सया चउदसाणं पि।।१०।।
एवमए सुदपवरा, भत्तीराएण संथुया तच्चा।
सिग्घं मे सुदलाहं, जिणवर-वसहा पयच्छंतु।।११।।
अंचलिका
इच्छामि भंते! सुदभत्तिकाउस्सग्गो कओ तस्सालोचेउं, अंगोवंग-पइण्णए पाहुडय-परियम्म-सुत्त-पढमाणिओग-पुव्वगयचूलिया चेव सुत्तत्थय-थुइ-धम्म-कहाइयं णिच्चकालं अंचेमि, पूजेमि, वंदामि, णमंसामि, दुक्खक्खओ, कम्मक्खओ, बोहिलाहो, सुगइगमणं, समाहिमरणं, जिणगुण-संपत्ति होउ मज्झं।
