मंगलाष्टक स्तोत्रं
अर्हंतो मंगलं कुर्यु:, सिद्धा: कुर्युश्च मंगलम्।
आचार्या: पाठकाश्चापि , साधवो मम मंगलम्।।१।।
मंगलं जिनधर्म: स्यात्, जिनवाणी च मंगलम्।
जिनार्चा जिनगेहाश्च, कुर्वंतु मम मंगलम्।।२।।
सप्तकोट्यो जिनागारा, लक्षाणि च द्विसप्तति:।
भवनेषु स्थिता: सर्वे, कुर्वंतु मम मंगलम्।।३।।
व्यंतराणां जिनागारा:, संख्यातीता विभान्त्यपि।
स्वात्मसिद्धिविधातार:, कुर्वंतु मम मंगलम्।।४।।
ज्योतिष्काणां जिनागारा:, असंख्या: संति सौख्यदा:।
स्वात्मज्योति: प्रयच्छन्तु कुर्वंतु मम मंगलम्।।५।।
चतुरशीतिलक्षा: साहस्रं सप्तनवतिक:।
त्रयोविंशा जिनागारा, वैमानिकाश्च मंगलम्।।६।।
चतु:शताष्टपंचाशत्, मध्यलोके जिनालया:।
भुक्तिमुक्तिप्रदातार:, कुर्वंतु मम मंगलम्।।७।।
मंगलं स्यान्महावीरो, बाहुबली च मंगलम्।
जिन शासनमाचंद्रं, स्थेयात् कुर्याच्च मंगलम्।।८।।
यो मंगलाष्टकस्तोत्रं, प्रत्यहं भक्तित: पठेत्।
पूर्णा ज्ञानमतिस्तस्य, भूयात् नित्यं सुमंगलम्।।९।।
इति मंडपान्त: पुष्पांजलिं क्षिपेत्।
