प्राकृत चारित्रभक्ति

तिलोए सव्वजीवाणं, हिदं धम्मोवदेसिणं।

वड्ढमाणं महावीरं, वंदित्ता सव्ववेदिणं।।१।।

घादिकम्म-विघादत्थं, घादिकम्म-विणासिणा।

भासियं भव्वजीवाणं, चारित्तं पंचभेददो।।२।।

सामाइयं तु चारित्तं, छेदोवट्ठावणं तहा।

तं परिहारविसुद्धिं च, संजमं सुुहुमं पुणो।।३।।

जहाखादं तु चारित्तं, तहाखादं तु तं पुणो।

किच्चाहं पंचहाचारं, मंगलं मलसोहणं।।४।।

अहिंसादीणि उत्ताणि, महव्वयाणि पंच य।

समिदीओ तदो पंच, पंचइंदिय-णिग्गहो।।५।।

छब्भेयावास भूसिज्जा, अण्हाणत्त-मचेलदा।

लोयत्तं ठिदिभुत्तिं च, अदंतधावण-मेव य।।६।।

एयभत्तेण संजुत्ता, रिसिमूलगुणा तहा।

दसधम्मा तिगुत्तीओ, सीलाणि सयलाणि च।।७।।

सव्वेवि य परीसहा, उत्तुत्तर-गुणा तहा।

अण्णे वि भासिया संता, तेसिं हाणिं मए कया।।८।।

जइ राएण दोसेण, मोहेणण्णादरेण वा।

वंदित्ता सव्वसिद्धाणं, संजदा सा मुमुक्खुणा।।९।।

संजदेण मए सम्मं, सव्वसंजमभाविणा।

सव्वसंजम-सिद्धीओ, लब्भदे मुत्तिजं सुहं।।१०।।

अंचलिका

इच्छामि भंते! चारित्तभत्तिकाउस्सग्गो कओ तस्सालोचेउं, सम्मण्णाणुज्जोयस्स, सम्मत्ताहिट्ठियस्स सव्वपहाणस्स, णिव्वाण-मग्गस्स, कम्मणिज्जर-फलस्स, खमाहारस्स, पंचमहव्वय-संपुण्णस्स, तिगुत्तिगुत्तस्स, पंचसमिदि-जुत्तस्स णाणज्झाणसाहणस्स, समयाइव-पवेसयस्स, सम्म-चारित्तस्स, णिच्चकालं, अंचेमि, पूजेमि, वंदामि, णमंसामि, दुक्खक्खओ, कम्मक्खओ, बोहिलाहो, सुगइगमणं, समाहिमरणं, जिणगुणसंपत्ति होउ मज्झं।