महावीराष्टक स्तोत्रम्

महावीराष्टक स्तोत्रम्

(पं. भागचन्द्रविरचित)
यदीये चैतन्ये मुकुर इव भावाश्चिदचित:।
समं भान्ति ध्रौव्यव्ययजनिलसंतोऽन्तरहिता:।।
जगत्साक्षी मार्गप्रकटनपरो भानुरिव यो।
महावीरस्वामी नयनपथगामी भवतु मे (न:)।।१।।

अताम्रं यच्चक्षु: कमलयुगलं स्पन्दरहितं।
जनान्कोपापायं प्रकटयति वाभ्यन्तरमपि।।
स्फुटं मूर्तिर्यस्य प्रशमितमयी वाति विमला।
महावीरस्वामी नयनपथगामी भवतु मे (न:)।।२।।

नमन्नाकेन्द्राली मुकुटमणि-भाजालजटिलं।
लसत्पादाम्भोज-द्वयमिह यदीयं तनुभृतां।।
भवज्वाला-शान्त्यै प्रभवति जलं वा स्मृतमपि।
महावीरस्वामी नयनपथगामी भवतु मे (न:)।।३।।

यदर्चाभावेन प्रमुदितमना दर्दुर इह।
क्षणादासीत्स्वर्गी गुणगणसमृद्ध: सुखनिधि:।।
लभंते सद्भक्ता: शिवसुखसमाजं किमु तदा।
महावीरस्वामी नयनपथगामी भवतु मे (न:)।।४।।

कनत्स्वर्णाभासोऽप्यपगत-तनुर्ज्ञाननिवहो।
विचित्रात्माप्येको नृपतिवरसिद्धार्थतनय:।।
अजन्मापि श्रीमान् विगतभवरागोद्भुत-गतिर्।
महावीरस्वामी नयनपथगामी भवतु मे (न:)।।५।।

यदीया वाग्गङ्गा विविधनयकल्लोलविमला।
वृहज्ज्ञानांभोभिर्जगति जनतां या स्नपयति।।
इदानीमप्येषा बुधजनमरालै: परिचिता।
महावीरस्वामी नयनपथगामी भवतु मे (न:)।।६।।

अनिर्वारोद्रेकस्त्रिभुवनजयी काम-सुभट:।
कुमारावस्थायामपि निजबलाद्येन विजित:।।
स्फुरन्नित्यानन्द-प्रशमपद-राज्याय स जिन:।
महावीरस्वामी नयनपथगामी भवतु मे (न:)।।७।।

महामोहातज्र्-प्रशमनपरा-कस्मिकभिषङ्।
निरापेक्षो बन्धुर्विदित-महिमा मङ्गलकर:।।
शरण्य: साधूनां भवभयभृतामुत्तमगुणो।
महावीरस्वामी नयनपथगामी भवतु मे (न:)।।८।।

-अनुष्टुप् छंद-
महावीराष्टकं स्तोत्रं, भक्त्या भागेन्दुना कृतं।
य: पठेच्छ्रणुयाच्चापि, स याति परमां गतिम्।।९।।
।। इति महावीराष्टकं स्तोत्रम्।।