सम्यक्त्वशीलगुणमण्डितपुण्यगात्र:।
रत्नत्रयैकनिधिधारणपुण्यपात्रम्।।
लेश्याविशुद्धपरिणामशुभोपयोगी।
तं धर्मसागरमुनीन्द्रमहं प्रवन्दे।।१।।
मिथ्यात्वशत्रुमदमर्दनधीरवीर:।
क्रोधाद्यमित्रवशवर्तिविधायिशूर:।।
क्षान्त्यादिधर्मदशधा परिपालयन् य:।
तं धर्मसागरमुनीन्द्रमहं प्रवन्दे।।२।।
मूलोत्तरान् गुणगणान् स्वयमेव धत्ते।
शिष्यांश्च धारयति मुक्तिपथे धुरीण:।।
सन्मार्गमादिशति सत्त्वहितैकबुद्ध्या।
तं धर्मसागरमुनीन्द्रमहं प्रवन्दे।।३।।
सिद्धांतशास्त्रपठने गुणने विपश्चित्।
अध्यात्मतत्त्वकथने स्वपरात्मवेदी।।
स्वात्मैकतत्त्वमनने सुसमाहितान्त:।
तं धर्मसागरमुनीन्द्रमहं प्रवन्दे।।४।।
पंचेन्द्रियस्य दमने कुशल: सुधीर:।
संसारसिंधुतरणे निपुणो वरेण्य:।।
अन्यांश्च तारयति पोतसमान एष:।
तं धर्मसागरमुनीन्द्रमहं प्रवन्दे।।५।।
दुर्ध्यानदूरकरणे खलु शांतचेता:।
मायादिदोषहरणे निजतत्त्ववेत्ता।।
स्वाध्यायपाठनिरतो जिनदेवभक्त:।
तं धर्मसागरमुनीन्द्रमहं प्रवन्दे।।६।।
श्रीशांतिसागरसुवंशलतां प्रसिंचन्।
संघाधिपो यतिवरो भविवृंदवंद्य:।।
सार्वो गभीरहृदयो व्रतवान् मुमुक्षु:।
तं धर्मसागरमुनीन्द्रमहं प्रवन्दे।।७।।
भव्याब्जबोधनविधौ भुवि यो विवस्वान्।
शिष्यान् पुनाति किल जंगमतीर्थतुल्य:।।
भक्तान् जनान् दिशति ज्ञानमतिं श्रियं य:।
तं धर्मसागरमुनीन्द्रमहं प्रवन्दे।।८।।