चतुर्विंशतिजिनस्तोत्रम्

-उपजाति छंद-

श्रीनाभिसूनुर्भुवनैकसूर्य:, श्रीधर्मतीर्थस्य प्रवर्तको य:।
भव्यैकबंधुर्जगदेकनाथ:, तमादिदेवं प्रणमामि नित्यं।।१।।

विजित्य सर्वं किल कर्मशत्रून्, अजेयशक्ति-हर््यजितो जिनेश:।
सौख्याकरोऽनंतगुणाकरो य:, द्वितीयतीर्थेशमहं स्तुवे तं।।२।।

पुनातु मे संभवनाथ! चित्तंं, पुन: पुन: संसृतिदु:खतप्तं।
संस्तौमि नित्यं शरणं प्रपद्ये, भवाम्बुधे: पारगतं महेशम्।।३।।

गुणैरनन्तैरभिनंदनोऽसा-वगात् समृद्धिं सहसा त्रिलोक्यां।
ददाति सौख्यं किल भाक्तिकानां, तं देवदेवं प्रणमामि भक्त्या।।४।।

नयप्रमाणै: सकलं सुतत्त्वं, प्रकाशयन् यो जगतामुदेति।
स: सर्वलोकैकविभास्वराख्यम्, वंदे सुमत्यै सुमतिं जिनं तं।।५।।

नक्षत्रवृंदै: समुपास्यमान:, विभ्राजते पूर्णकल: शशीव।
धर्मामृतै: सिंचति भव्यजीवान्, पद्मालयं पद्मजिनं स्तुवे तं।।६।।

गणाधिपै: साधुनरामराद्यै:, रराज यो दिव्यसभासु मध्ये।
भव्याब्जसूर्यो गतरागमोह:, वंदे सुपार्श्वं तं देवदेवम्।।७।।

चंद्रप्रभो वागमृतांशुभिर्यो, जनान् प्रपुष्यन्नकलंकयुक्त:।
न चापि दोषाकरतां प्रयाति, सदा स्तुवे तं भवतापशून्यं।।८।।

पुष्यंति भव्यास्तव नाममंत्रै:, तुष्यंति नित्यं गुणकीर्तनेन।
पुष्यान्मनो मे जिनपुष्पदंत:, त्वां भक्तिपुष्पांजलिनार्चयामि।।९।।

संसारदावाग्निषु दग्धजीवा:, शीतीभवन्त्याश्रयतस्तवैव।
श्रीशीतलेशो भुवनत्रयेश:, शीतं मनो मे कुरु वाक्सुधाभि:।।१०।।

श्रेयान् जिन: श्रेयसि मार्गलग्नान्, शरीरिणो रक्षतु विघ्नवृंदात्।
श्रेयस्करो मे भवतात् समंतात्, श्रियं विदध्यात् शिवसौख्यकर्त्री।।११।।

देवेंद्रवृंदैर्नरनाथमुख्यै:, मुनीश्वरै: सर्वगणाधिपैश्च।
सदा प्रपूज्यो भुवनेषु पूज्य: त्वां वासुपूज्यं प्रणमामि भक्त्या।।१२।।

मलैर्विमुक्तो विमलो जिनस्त्वं, त्वदंघ्रिसेवा विमलीकरोति।
मन: पुनीते किल भाक्तिकानाम्, नमामि नित्यं विमलं विशुद्ध्यै।।१३।।

अनंत! दृग्ज्ञानसुवीर्यसौख्यं, अनंततां याति तव प्रसादात्।
अनंतदोषान् जिन! मे लुनीहि, नमाम्यनंतं हृदि धारये त्वां।।१४।।

श्रीधर्मचक्रं भुवि चालयन् त्वम्, श्रीधर्मतीर्थंकरतां गतस्त्वम्।
क्षमादिधर्मान् किल लब्धयेऽहं, श्रीधर्मनाथं शिरसा नमामि।।१५।।

शांतिं भवेत्सर्वजगज्जनानां, शांतिं भवेत्सर्वगणाय नित्यं।
शांतं मनो मे भवसर्वतापात्, श्रीशांतिनाथं प्रणमामि नित्यं।।१६।।

संसारवार्धौ विनिमग्नजंतून्, उद्धृत्य यो मोक्षपदे धरन् हि।
कृपापरस्तं प्रभुकुंथुनाथं, नमामि भक्त्या परया मुदा च।।१७।।

स्तुत्या न तुष्यन् प्रददाति सौख्यं, प्रद्वेषतो दु:खमपि प्रदत्ते।
तथाप्यरस्त्वं किल वीतराग:, ह्यचिंत्यमाहात्म्यमत:स्तुवे त्वां।।१८।।

य: कर्ममल्लं प्रतिमल्ल एव, श्रीमल्लिनाथो भुवनैकनाथ:।
संसारवल्लिं च लुनीहि मे त्वं, मन: प्रसत्तिं कुरु मे समंतात्।।१९।।

महाव्रतं मुक्तिपथं दधान:, प्राप्त: प्रमुक्तिं मुनिसुव्रतस्त्वं।
बोधि: समाधि: परिणामशुद्धि:, भूयात् सदा मे हि नमोऽस्तु तुभ्यं।।२०।।

देवेन्द्रनागेन्द्रनरेन्द्रवंद्यं, श्रीदेवदेवं नमिनामधेयं।
भक्त्या प्रवंदे त्रयशुद्धितस्त्वां, मन:समाधिं, विदधातुदेव।।२१।।

जंतून् विलोक्याशु दयां चकार, राजीमतीं, सर्वपरिग्रहं च।
त्यक्त्वा गृहीत् धर्मधुरं सुदीक्षां, तं नेमिनाथं शिरसा नमामि।।२२।।

भवे भवे दैत्यकृतोपसर्गं, सोढ्वा क्षमावान् जिनराजराज:।
महामना: पार्श्वजिन: स्तुवे त्वां, सर्वंसहां मे कुरु नाथ! शक्तिं।।२३।।

श्रियाभिवृद्ध: खलु वर्धमान:, श्रीमुक्तिलक्ष्म्या भुवनाधिनाथ:।
सर्वार्थसिद्ध्या कृतकृत्यसिद्ध:, त्वां नौमि भो वीर! निजात्मसिद्ध्यै।।२४।।

अनुष्टुप् छंद- चतुर्विंशतितीर्थेशां, स्तुतिं कृत्वा सुभक्तित:।
याचे स्वात्मश्रियं नित्या-मर्हज्ज्ञानमतिं त्वरं।।२५।।