सिद्धभक्ति

सिद्धानुद्धूतकर्मप्रकृतिसमुदयान्साधितात्मस्वभावान् ।

वंदे सिद्धिप्रसिद्ध्यै तदनुपमगुणप्रग्रहाकृष्टितुष्टः।।

सिद्धिः स्वात्मोपलब्धिः प्रगुणगुणगणोच्छादिदोषापहारात्।

योग्योपादानयुक्त्या दृषद इह यथा हेमभावोपलब्धिः।।१।।

नाभावः सिद्धिरिष्टा न निजगुणहतिस्तत्तपोभिर्न युत्तेक्-

रस्त्यात्मानादिबद्धः स्वकृतजफलभुक् तत्क्षयान्मोक्षभागी।।

ज्ञाता द्रष्टा स्वदेहप्रमितिरुपसमाहारविस्तारधर्मा।

ध्रौव्योत्पत्तिव्ययात्मा स्वगुणयुत इतो नान्यथा साध्यसिद्धिः।।२।।

सत्वन्तर्बाह्यहेतुप्रभवविमलसद्दर्शनज्ञानचर्या-

सम्पद्धेतिप्रघातक्षतदुरिततया व्यञ्जिताचिन्त्यसारैः।।

कैवल्यज्ञानदृष्टिप्रवरसुखमहावीर्य-सम्यक्त्वलब्धि-

ज्योतिर्वातायनादिस्थिरपरमगुणैरद्भुतैर्भासमानः ।।३।।

जानन्पश्यन्समस्तं सममनुपरतं संप्रतृप्यन्वितन्वन्,

धुन्वन्ध्वान्तं नितान्तं निचितमनुसभं प्रीणयन्नीशभावम्।

कुर्वन्सर्वप्रजानामपरमभिभवन् ज्योतिरात्मानमात्मा।।

आत्मन्येवात्मनासौ क्षणमुपजनयन्सत्स्वयंभू प्रवृत्तः।।४।।

छिन्दन्शेषानशेषान्निगलबलकलींस्तैरनन्तस्वभावैः

सूक्ष्मत्वाग्र्यावगाहागुरुलघुकगुणैः क्षायिकै: शोभमानः।

अन्यैश्चान्यव्यपोहप्रवणविषयसंप्राप्तिलब्धिप्रभावै-

रूध्र्वंव्रज्यास्वभावात्समयमुपगतो धाम्नि संतिष्ठतेग्र्ये।।५।।

अन्याकाराप्तिहेतुर्न च भवति परो येन तेनाल्पहीनः

प्रागात्मोपात्तदेहप्रतिकृतिरुचिराकार एव ह्यमूर्तः१।

क्षुत्तृष्णाश्वासकासज्वरमरणजरानिष्टयोगप्रमोह –

व्यापत्त्याद्युग्रदुःखप्रभवभवहतेः कोऽस्य सौख्यस्य माता।।६।।

आत्मोपादानसिद्धं स्वयमतिशयवद्वीतबाधं विशालं।

वृद्धिह्रासव्यपेतं विषयविरहितं निष्प्रतिद्वन्द्वभावम् ।

अन्यद्रव्यानपेक्षं निरुपमममितं शाश्वतं सर्वकालं।

उत्कृष्टानन्तसारं परमसुखमतस्तस्य सिद्धस्य जातम् ।।७।।

नार्थः क्षुत्तृट्विनाशाद्विविधरसयुतैरन्नपानैरशुच्या-

नास्पृष्टेर्गन्धमाल्यैर्नहि मृदुशयनैग्र्लानिनिद्राद्यभावात् ।

आतंकार्तेरभावे तदुपशमनसद्भेषजानर्थतावद्

दीपानर्थक्यवद्वा व्यपगततिमिरे दृश्यमाने समस्ते।।८।।

तादृक्सम्पत्समेता विविधनयतपः संयमज्ञानदृष्टि-

चर्यासिद्धाः समन्तात्प्रविततयशसो विश्वदेवाधिदेवाः।

भूता भव्या भवन्तः सकलजगति ये स्तूयमाना विशिष्टैः

तान्सर्वान्नौम्यनंतान्निजिगमिषुररं तत्स्वरूपं त्रिसन्ध्यम् ।।९।।

क्षेपक श्लोक-आर्या- कृत्वा कायोत्सर्गं, चतुरष्टदोषविरहितं सुपरिशुद्धम् ।

अतिभक्ति-संप्रयुक्तो, यो वंदते स लघु लभते परमसुखम्।।

अंचलिका

इच्छामि भंत्ते! सिद्धभत्तिकाउस्सग्गो कओ तस्सालोचेउं सम्मणाण-सम्मदंसण-सम्मचारित्तजुत्ताणं अट्ठविहकम्मविप्पमुक्काणं अट्ठगुणसंपण्णाणं उढ्ढलोयमत्थयम्मि पयट्ठियाणं तवसिद्धाणं-णयसिद्धाणं संजमसिद्धाणं-चरित्तसिद्धाणं अतीताणागदवट्टमाण-कालत्तयसिद्धाणं सव्वसिद्धाणं णिच्चकालं अंचेमि पूजेमि वंदामि णमंसामि दुक्खक्खओ कम्मक्खओ बोहिलाहो सुगइगमणं समाहिमरणं जिणगुणसंपत्ति होउ मज्झं।