श्री वीर जिनस्तोत्र

मयूरगति छन्द-(२३ अक्षरी)

सिद्धिवधूप्रियनाथ! जिनेश्वर! वीर! महागुणरत्नसुराशे!।

कुण्डलपू: त्रिशलाजननी बहुपुण्यवती सुरवृन्दनुतासीत्।।

मंगलदं भुवि हर्षकरं जिन! गर्भमवाप शुचौ सितषष्ठ्यां।

सन्मतिदेव! सदा मम सन्मतये भवतात् प्रणमामि मुदा त्वां।।१।।

तन्वी छन्द-(२४ अक्षरी)

चैत्रसिते या, जिनजनिरभवत्, सा त्रययुक्तदशमदिवसे वै।

देवसुरेन्द्रै:, सुरगिरिशिखरे, जन्ममहोत्सवविधिरभिनीत:।।

मार्गसुकृष्णे, दशमितदिवसे, रत्नमहाव्रतगुणविधृतस्त्वं।

भूर्युपसर्गं भव इति विहित: ध्यानरतो नहि, विचलितचित्त:।।२।।

क्रौंचपदा छन्द-(२५ अक्षरी)

घातिविघाती केवलबोध: स्पुरितसकलभुवि निजरविरुदित:।

माधवमासे शुक्लदशम्यां त्रिभुवनमिदमिति करतलफलवत् ।।

श्रावण आद्ये गीस्तव दिव्या भविजनहृदयकमलमुदमकरोत्।

आयुरभूद् द्वासप्ततिवर्षास्तव जिनवर! मम भव शिवगतये।।३।।

तन्वी छन्द-(२४ अक्षरी)

कार्तिकमासे शिवपदमगमत् कृष्णचतुर्दशदिवसनिशांते।

तीर्थसुपावापुरमिह भणितं सप्तकरोच्छ्रित इति कनकाभ:।।

बालयतिस्त्वं जिनवरचरमो मृत्युजयी खलु मृगपतिचिन्हः ।

नौम्यतिवीरं शमदमकथकं वीरमनंतमतुलसुखराशिं।।४।।

स्यादिति वाद: सुवचनममृतं ते जिन! संसृतिगदमपहर्तृ।

मारजयी त्वं हरमदहरणो नाथसुवंशतिलक इह लोके।।

ज्ञानमतिश्री: झटिति भवतु मे भक्तिवशात् तव मुनिगणवंद्या।

स्वात्मजसिद्धिध्रुवसुखजननी सन्मतिदेव! सकलविमला स्यात् ।।५।।

अनुष्टुप् छन्द

वर्धमानो महावीर:, श्रीमान् सिद्धार्थनन्दन:।

त्वत्संस्तुते: स्मृतेश्चापि, विघ््नौघ: प्रलयं व्रजेत् ।।६।।

जीयाद्वीरजिनेन्द्रस्य, शासनं जिनशासनं।

प्रभवेत् वर्धमानस्य, धर्मचक्रं सदा भुवि।।७।।