णवकार-मंत्र-माहात्म्य
धण-धाइ-कम्म-मुक्का अरहंता तह य सव्व सिद्धा य ।
आयरिय उवज्झाया पवरा तह सव्वसाहूणं ।।१।।
एयाण णमोक्कारो पंचण्हं पंच-लक्खण-धराणं ।
भवियाण होइ सरणं संसारे संसरंताणं ।।२।।
उड्ढमह-तिरियलोए जिण-णवकारो पहाणओ णवरं ।
णर-सुर-सिव-सुक्खाणं कारणयं इत्थ भुवणम्मि ।।३।।
तेण इमो णिच्चंचिय पढिजइ सुत्तु-टिठएहि अणवरयं ।
हो हं चिय दुह-दलणो सुह-जणओ भवियलोयस्स ।।४।
जाए वि जो पढिज्जइ जेण व जायस्स होइ फल-रिद्धि ।
अवसाणे वि पढिज्जइ जेण मुओ सुग्गई जाई ।।५।।
आवइहि वि पढिज्जइ जेण व लंघेइ आवइ-सयाइ ।
द्धिहि वि पढिज्जइ जेण वसा जाइ वित्थारं ।।६।।
णर-सुर हुंति सुराणं विज्जाहर-नेय-सुर-वरिंदाणं ।
जाण इमो णवयारो सासुव्व (हारुव्व) पइट्ठिसं कंठे ।।७।।
जह अहिणा दटठाणं गारुडमंतो विसं पणासेइ ।
तह णवकारो मंतो पाव-विसं णासए सेसं ।।८।।
किं एण महारायणं किं वा चिंतामणिव्व णवयारो ।
किं कप्पद्दुमसरिसो णहु णहु ताणं पि अहिययरो ।।९।।
चिंतामणि-रयणाई कप्पतरू एक्क जम्म सुह-हेऊ ।
णवकारो पुणु पवरो सग्गपवग्गाण दायारो ।।१०।।
जं किंचि परमतच्चं परमप्पयकारणं पि जं किंवि ।
तत्थ इमो णवकारो झाइज्जइ परमजोईहि ।।११।।
जो गुणइ लक्खमेगं पूयाविहिएण जिण-णमोक्कारं ।
तित्थयरणामगोयं सो बंधइ णत्थि संदेहो ।।१२।।
सट्ठिसयं विजयाणं पवशणं जत्थ सासओ कालं ।
तत्थं वि जिण-णवयारो पढिज्जइ परम-पुरिसेहि ।।१३।।
अइरावएहि पंचहि पंचहि भरएहि सो वि पढिजंति ।
जिण-णवयारो एसो सासय-सिव-सुक्ख-दायारो ।।१४।।
जेण पुरं तेण (?) इमो णवयारो पाविओ कयत्थेण ।
सो देवलोग गंतुं परमपयं तं पि पावेइ ।।१५।।
एसो अणाइकाले अणाइजीवो अणाइ जिणधम्मो ।
तइयावि ते पढंता एसो विय जिण-णमोयारो ।।१६।।
जे के वि गया मोक्खं गच्छंति य के वि कम्म-खल-मुक्का ।
ते सव्वे विय जाणसु जिण-णवयारस्स भावेण ।।१७।।
इय एसो णवयारो भणियउ सुर-सिद्ध-खयर-पमुहेहि ।
जो पढइ भत्तितुत्तो सो पावई सासयं ठाणं ।।१८।।
अडवि-गिरि-राय-मज्झे भयं पणासेइ चिंतिओं संतो ।
रक्खइ भविय-सयाइ माया जह पुत्त-डिंभाइं ।।१९।।
थंभेइ जलं जलणं चिंतियमित्तेण जिण-णमोयारो ।
अरि-चोर-मारि-रावल-घोरुवसग्गं पणासेइ ।।२०।।
णो किंचि तह स पहवइ डाइणि-वेयाल-रिक्ख-मारि-भयं ।
णवयार-पहावेणं णासंति ते सयल-दुरियाइ ।।२१।।
सयल-भय-वाहि-तक्कर-हरि-करि-संगाम-विसहर-भयाइ ।
णासंति तक्खणेणं जिण-णवयारो पद्दावेणं ।।२२।।
हियइ-गुहाइ णवकार-केसरी जेण संठिओ णिच्चं ।
कम्मट्ठ-गंठि-गय-घट्टथट्टयंताण परणट्टं ।।२३।।
तव-संजम-णियम-रहो पंच-णमोकार-सारहि णिरुत्तो ।
णाण-तुरंगम-जुत्तो जेण फुडं परमणिव्वाणं ।।२४।।
जिणसाणस्स सारो चउदस- पुव्वाइ जो समुद्धारो ।
जस्स मणे णवयारो संसारो तस्स किं कुणइ ।।२५।।
जैन वाङ्मय में णमोकार या नमस्कार-मंत्र का वही स्थान है, जो वैदिक वाङ्मय में गायत्री-मंत्र का है। इस मंत्र में क्रमश: अरिहंत, सिद्ध, आचार्य, उपाध्याय और सर्वसाधु इन पंचपरमेष्ठियों को नमस्कार किया गया है। यह णवकार-मंत्र-माहात्म्य नामक स्तोत्र अजमेर-शास्त्र-भंडार के एक गुटके से उपलब्ध हुआ है। इसके रचियता ने णमोकार-मन्त्र को अनादिमूलमन्त्र के नाम से संयुक्तिक सिद्ध कर उसे जिन-शासन का सार और चौदह पूर्व-महार्णव का समुद्धार बताया है। साथ ही उसे दु:ख को दलन करने और सर्व सुख को देने वाला तथा स्वर्ग-अपवर्ग का दाता प्रकट किया है। रचना इतनी सरल और सरस है कि पढ़ने के साथ ही उसका अर्थ-बोध हो जाता है। इसके रचियता के नाम आदि का उक्त रचना पर से कुछ पता नहीं चलता।
पं. हीरालाल सिद्धान्तशास्त्री अनेकान्त जन०-मार्च २०१२
