शांतिभक्ति: (श्री पूज्यपादाचार्य कृत)
न स्नेहाच्छरंण प्रयान्ति भगवन्! पादद्वयं ते प्रजा:।
हेतुस्तत्र विचित्रदु:खनिचय:, संसारघोरार्णव:।।
अत्यन्तस्फुरदुग्ररश्मिनिकर-व्याकीर्ण-भूमण्डलो।
ग्रैष्म: कारयतीन्दुपादसलिल-च्छायानुरागं रवि:।।१।।
क्रूद्धाशीर्विषदष्टदुर्जयविष-ज्वालावलीविक्रमो।
विद्याभैषजमन्त्रतोयहवनै-र्याति प्रशांतिं यथा।।
तद्वत्ते चरणारुणांबुजयुग-स्तोत्रोन्मुखानां नृणाम्।
विघ्ना: कायविनायकाश्च सहसा, शाम्यन्त्यहो! विस्मय:।।२।।
संतप्तोत्तमकांचनक्षितिधरश्रीस्पद्र्धिगौरद्युते!
पुंसां त्वच्चरणप्रणामकरणात्, पीडा: प्रयान्ति क्षयं।।
उद्यद्भास्करविस्फुरत्करशत-व्याघातनिष्कासिता।
नानादेहिविलोचनद्युतिहरा, शीघ्रं यथा शर्वरी।।३।।
त्रैलोक्येश्वरभंगलब्ध विजयादत्यन्तरौद्रात्मकान्।
नानाजन्मशतान्तरेषु पुरतो, जीवस्य संसारिण:।।
को वा प्रस्खलतीह केन विधिना, कालोग्रदावानलान्।
नस्याच्चेत्तव पादपद्मयुगल-स्तुत्यापगावारणम्।।४।।
लोकालोकनिरन्तरप्रवतित-ज्ञानैकमूर्ते! विभो!
नानारत्नपिनद्धदंडरुचिर-श्वेतातपत्रत्रय!।।
त्वत्पादद्वयपूतगीतरवत: शीघ्रं द्रवन्त्यामया:।
दर्पाध्मातमृगेन्द्रभीमनिनदाद्वन्या यथा कुञ्जरा:।।५।।
दिव्यस्त्रीनयनाभिरामविपुल श्रीमेरुचूणामणे।
भास्वद्बालदिवाकर द्युतिहर! प्राणीष्टभामंडल!।।
अव्याबाधमचिन्त्यसारमतुलं, त्यक्तोपमं शाश्वतं।
सौख्यं त्वच्चरणारविंदयुगल-स्तुत्यैव संप्राप्यते।।६।।
यावन्नोदयते प्रभापरिकर:, श्री भास्करो भासयं-
स्तावद् धारयतीह पंकजवनं, निद्रातिभारश्रमम्।।
यावत्त्वच्चरणद्वयस्य भगवन्न स्यात्प्रसादोदय-
स्तावज्जीवनिकाय एष वहति प्रायेण पापं महत्।।७।।
शांतिं शान्तिजिनेन्द्र! शांतमनसस्त्वत्पादपद्माश्रयात्।
संप्राप्ता: पृथिवीतलेषु बहव: शांत्यर्थिन: प्राणिन।।
कारुण्यान्मम भाक्तिकस्य च विभो! दृष्टिं प्रसन्नां कुरु।
त्वत्पादद्वयदैवतस्य गदत: शांत्यष्टकं भक्तित:।।८।।
शांतिजिनं शशिनिर्मलवक्त्रं, शीलगुणव्रतसंयमपात्रम्।
अष्टशतार्चितलक्षणगात्रं, नौमि जिनोत्तममम्बुजनेत्रम्।।९।।
पंचममीप्सितचक्रधराणां, पूजितमिंद्र-नरेन्द्रगणैश्च।
शांतिकरं गणशंतिमभीप्सु:, षोडशतीर्थकरं प्रणमामि।।१०।।
दिव्यतरु: सुरपुष्पसुवृष्टिर्दुन्दुभिरासनयोजनघोषौ।
आतपवारणचामरयुग्मे, यस्य विभाति च मंडलतेज:।।११।।
तं जगदर्चितशांतिजिनेन्द्रं, शांतिकरं शिरसा प्रणमामि।
सर्वगणाय तु यच्छुत शांतिं, मह्यमरं पठते परमां च।।१२।।
येभ्यर्चिता मुकुटकुंडलहाररत्नै:, शक्रादिभि: सुरगणै: स्तुतपादपद्मा:।
ते मे जिना: प्रवरवंशजगत्प्रदीपा: तीर्थंकरा: सततशांतिकरा भवंतु।।१३।।
संपूजकानां प्रतिपालकानां, यतीन्द्रसामान्यतपोधनानां।
देशस्य राष्ट्रस्य पुरस्य राज्ञ: करोति शांतिं भगवान् जिनेन्द्र:।।१४।।
क्षेमं सर्वप्रजानां, प्रभवतु बलवान् धार्मिको भूमिपाल:।
काले काले च सम्यग्वर्षतु मघवा व्याधयो यांतु नाशं।।
दुर्भिक्षं चौरमारी क्षणमपि जगतां, मा स्म भूज्जीवलोके।
जैनेन्द्रं धर्मचक्रं, प्रभवतु सततं, सर्वसौख्यप्रदायि।।१५।।
तद्द्रव्यमव्ययमुदेतु शुभ: स देश:, संतन्यतां प्रतपतां सततं स काल:।
भाव: स नन्दतु सदा यदनुग्रहेण, रत्नत्रयं प्रतपतीह मुमुक्षुवर्गे।।१६।।
प्रध्वस्तघातिकर्माण:, केवलज्ञानभास्करा:।
कुर्वन्तु जगतां शांतिं, वृषभाद्या जिनेश्वरा:।।१७।।
अंचलिका
इच्छामि भंते! संतिभत्तिकाउस्सग्गो कओ तस्सालोचेउं पंचमहाकल्लाण-संपण्णाणं, अट्ठमहापाडिहेरसहियाणं, चउतीसातिसयविशेषसंजुत्ताणं, बत्तीसदेवेंद-मणिमयमउडमत्थयमहियाणं, बलदेववासुवेदचक्कहररिसि-मुणिजइअण-गारोवगूढाणं, थुइसयसहस्सणिलयाणं उसहाइवीरपच्छिममंगलमहापुरिसाणं, णिच्चकालं अंचेमि, पूजेमि, वंदामि, णमंसामि, दुक्खक्खओ कम्मक्खओ बोहिलाओ सुगइगमणं समाहिमरणं जिनगुणसंपत्ति होउ मज्झं।
