श्री धर्मनाथ स्तुति: तीर्थकृद्धर्मनाथस्त्वं, धर्मसृष्टेर्विधायक:। तीर्थकृद्धर्मनाथं त्वां, नमामि धर्मवृद्धये।।१।। तीर्थकृद्धर्मनाथेन, दयाधर्मो निरूपित:। तीर्थकृद्धर्मनाथाय, नम: कुर्वन्ति साधव:।।२।। तीर्थकृद्धर्मनाथाद् हि, जातं तीर्थ-मनुत्तरं। तीर्थकृद्धर्मनाथस्य, भाक्तिका: त्रिदशाधिपा:।।३।। तीर्थकृद्धर्मनाथे हि, धर्मा: सर्वे सदा स्थिता:। तीर्थेश! धर्मनाथ! त्वं, संसारात् मां समुद्धर।।४।।
श्री अनन्तनाथ स्तुति: श्रीमाननंतनाथस्त्वं, अंतकांतकविश्रुत:। श्रीमदनंतनाथं त्वां, नमन्ति नृसुरासुरा:।।१।। श्रीमतानंतनाथेना-नंतजीवदया कृता। श्रीमतेऽनंतनाथाय, मम नमोऽस्त्वनंतश:।।२।। श्रीमतोऽनंतनाथात् हि, तीर्थमनंतसौख्यकृत्। श्रीमतोऽनंतनाथस्य, भक्तिर्भवान्तकारिणी।।३।। श्रीमदनंतनाथे हि, नतिं भक्तिं सदा दधे। श्रीमन्ननंतनाथ! त्वं, देह्यनन्तचतुष्टयम्।।४।।
श्री विमलनाथ स्तुति: श्रीमान् विमलनाथस्त्वं, शून्य: कर्ममलादिभि:। श्रीमद्विमलनाथं त्वां, नमंति त्रिदशाधिपा:।।१।। श्रीमद् विमलनाथेन, स्वस्यात्मा विमलीकृत:। तस्मै विमलनाथाय, नमोऽस्तु परमात्मने।।२।। श्रीमद्विमलनाथाद् हि, नास्ति कश्चिद् हितंकर:। श्रीमद्विमलनाथस्य, श्रयामि चरणद्वयम्।।३।। श्रीमद्विमलनाथे मे, सर्वकालं रुचिर्भवेत्। प्रभो! विमलनाथ! त्वं, मह्यं यच्छाचलं पदम्।।४।।
श्री वासुपूज्य जिनस्तुति: वासुपूज्यजिनेन्द्रस्त्वं, सुरासुरगणैर्नुत:। वासुपूज्यजिनेन्द्रं त्वां, श्रित्वा भव्या: पुनन्ति स्वं।।१।। वासुपूज्यजिनेन्द्रेण, पंचकल्याणका: श्रिता:। वासुपूज्यजिनेन्द्राय, कोटिशो मे नमो नम:।।२।। वासुपूज्यजिनेन्द्रात् स्यात्, धर्मस्य महिमा भुवि। वासुपूज्यजिनेन्द्रस्य, भाक्तिका: इह विश्रुता:।।३।। वासुपूज्यजिनेन्द्रेऽद्य, भक्त्या दधे स्वमानसं। वासुपूज्यजिनेन्द्र! त्वं, यच्छ मे गुणसंपदम्।।४।।
श्री श्रेयांसजिन स्तुति: श्रीश्रेयांसजिनेन्द्रस्त्वं, श्रेयोमार्गविधायक:। श्रीश्रेयांसजिनेन्द्रं त्वां, श्रित्वा मिथ्यात्वदूरगा:।।१।। श्रीश्रेयांसजिनेन्द्रेण, स्वरागाद्या: स्वयं हता:। श्रीश्रेयांसजिनेन्द्राय, नमो नमोऽस्तु श्रद्धया।।२।। श्रीश्रेयांसजिनेन्द्राद् हि-लब्धं रत्नत्रयं जनै:। श्रीश्रेयांसजिनेन्द्रस्य, वाक्सुधा शिवदायिनी।।३।। श्रीश्रेयांसजिनेन्द्रेऽस्मिन्, बहिरंत:-श्रिय: स्थिता:। श्रीश्रेयांसजिनेन्द्र! त्वं, यच्छ श्रेयस्करीं मतिम्।।४।।
श्री शीतलनाथ स्तुति: श्रीमान् शीतलनाथस्त्वं, स्वात्मसौख्यप्रदायक:। शीतलनाथतीर्थेशं, श्रित्वानंदं श्रयन्त्यपि।।१।। श्रीमत् शीतलनाथेन, शीती भूता जना इह। श्रीमत् शीतलनाथाय, नमोऽस्तु कोटिशो मम।।२।। तीर्थं शीतलनाथाद् स्यात्, चंदनादपि शीतलं। श्रीमत् शीतलनाथस्य वाणीह्यमृतवत् भुवि।।३।। विभौ शीतलनाथे हि, चित्तं स्थिरं करोम्यहं। प्रभो! शीतलनाथ! त्वं, कृपां कृत्वा पुनीहि मां।।४।।
श्री पुष्पदंतनाथ स्तुति: श्रीपुष्पदंततीर्थेश:, भव्यपंकजभास्कर:। श्रीपुष्पदंततीर्थेशं, भक्त्या नमन्ति खेचरा:।।१।। श्रीपुष्पदंतनाथेन, धर्मतीर्थं प्रवर्तितं। श्रीपुष्पदंतनाथाय, नम: कुर्वन्ति साधव:।।२।। श्रीपुष्पदंततीर्थेशात्, क्षेमं सर्वत्र जायते। श्रीपुष्पदंतनाथस्य, विश्वस्मिन् वैरिणो न हि।।३।। श्री पुष्पदंततीर्थेशे, मतिं धृत्वा सुखी भव। श्री पुष्पदंततीर्थेश! त्वं मां रक्ष जगद्गुरो!।।४।।
श्री चन्द्रप्रभ स्तुति: श्रीचन्द्रप्रभदेवस्त्वं, चंद्रकांतिसमप्रभ:। श्रीचन्द्रप्रभदेवं त्वां, नमन्ति स्वसुखाप्तये।।१।। श्रीचन्द्रप्रभदेवेन, मोहध्वांतमपाकृतं। श्रीचन्द्रप्रभदेवाय, नम: स्वात्मगुणाप्तये।।२।। श्रीचन्द्रप्रभदेवात् हि, ज्ञानदीधितय: स्फुटा:। श्रीचन्द्र्रप्रभदेवस्य, भासंते भाक्तिका: भुवि।।३।। श्रीचन्द्रप्रभदेवेऽहं, दधे नित्यं स्वमानसं। श्रीचन्द्रप्रभदेव! त्वं, मह्यं देहि स्वसंपदं।।४।।
श्री सुपार्श्वनाथ स्तुति: श्रीसुपार्श्वजिनो भव्यान्, स्वात्मपार्श्वं नयत्यमून्। श्रीसुपार्श्वजिनं नित्यं, स्तुवन्ति गणनायका:।।१।। श्रीसुपार्श्वजिनेनात्र, कर्मपाशच्छिद: स्वयं। श्रीसुपार्श्वजिनायाद्य, कोटिशो मे नमो नम:।।२।। श्रीसुपार्श्वजिनाद् भव्या:, कुदृक्पार्श्वात् विदूरगा:। श्रीसुपार्श्वजिनस्य द्वौ, मार्गौ सन्मुक्तिपार्श्वगौ।।३।। श्रीसुपार्श्वजिने पार्श्वे, मुनीन्द्रा नृसुरा: स्थिता:। श्रीसुपार्श्वजिन! त्वं मे, मतिं स्वपार्श्वगां दिश।।४।।
श्री पद्मप्रभ स्तुति: श्रीपद्मप्रभदेवस्त्वं, लक्ष्म्यंतर्बाह्यसंयुत:। श्रीपद्मप्रभदेवं त्वां, श्रित्वा लक्ष्मीधरा जना:।।१।। श्रीपद्मप्रभदेवेन, लब्धाऽर्हज्ज्ञानश्री: स्वयं। श्रीपद्मप्रभदेवाय, दत्ता भक्ति: सुमाञ्जलि:।।२।। श्रीपद्मप्रभदेवाद् हि, मुक्तिश्रीवश्यमाप्नुते। श्रीपद्मप्रभदेवस्यानंतानंता गुणा मता:।।३।। श्रीपद्मप्रभदेवे हि, भक्ति: स्थिरा भवेन्मम। हे पद्मप्रभदेव! त्वं, यच्छ स्वात्म-श्रियं मम।।४।।